Posted in
August 2008
| 17. August 2008, 18:49
Hallo zaeme
Die letschte vier Taeg hei mr in Saigon verbracht, geschter hei mr es Motorbike gmietet und si e Hundu-Tempel, e Moschee, wo Froue ke Zuetritt hei ka (da gseht me wieder einisch d Toleranz vo de Religione!), e buddhistischi Pagode und d Wiedervereinigungshalle ga bsueche. Naer si mr no ga Billiard spiele, vorgeschter hei mr Bowling gspielt. Mit de Foeteli klappts nid hie in Vietnam :-( ! I de letschte paar Taeg hets immer wieder fescht graegnet, es isch haut Monsun-Zit in Vietnam.
Mir wuesse nid, ob mir in China oder uf dr Zugsreis no mau d Moeglechkeit hei, iz Internet z ga. In China choennts sehr schwierig waerde, dert isch viu zensuriert. Vilech choei mr gar nid uf uesi Site ga. Oemu google isch zensuriert. Aber mir froeie ues trotzdem ufs neue Land und uf d Zugsreis! Mir hei viu erlaebt in Vietnam und Kambodscha, am Beschte verzelle mr das de dehei, schuesch wirds z laeng :-) Mir si oemu es guets Team und hei ab und zue scho fuer uesi Raecht muesse kaempfe!
Aso no zum witere Reiseprogramm: Morn geits ueber Hongkong nach Shanghai, e Wuche speter nach Peking. Naer faht d Zugsreis mit em "Zarengold" a. Witer geits id Mongolei und nach Russland. Mir waerde ir Mongolei und in Russland i Staedt halte, mir si nid die ganzi Zit im Zug. Am 8. September choeme mir de in Moskau a.
Fuer die naechschti Zit isch das der letscht Eintrag uf uesere Site, ussert mir hei no mau d Moeglechkeit drzue. Im Moment raegnets hie grat in Stroemen, das hani ir Schwiz no nie gseh!
Lg Flo und Dario
Permalink
Posted in
August 2008
| 10. August 2008, 21:42
Mir sin nach 6 Std. gued in Siem Reap ako. Die letscht Nacht hae mr in Phnom Penh verbrocht. Dr erscht Idrugg vo Kambodscha isch gued, abr Aenglisch koenne si au do nid... S jetztige Hotel isch no ganz gedige. Leidr sin ufgrund vom Tourismus d Priise im Verglich zue Vietnam und em raeschtliche Kambodscha raecht hoch.
Morn gots zum Angkor Wat, das wird sicher e Erlaebnis. Mol luege oeb mr die plante siebe Stunde au dure halte ;)
E liebe Gruess
Flo + Dario
Permalink
Posted in
August 2008
| 08. August 2008, 16:12
Hallo zaeme
Mir hei lang nid iz Internet choenne, drum schribe mr ersch itze. Mir hei viu erlaebt uf uesem Waeg vo Hanoi nach Saigon. Im Moment si mr ganz im Suede, im Mekong-Delta. Uebermorn geits de fuer drue Taeg nach Kambodscha, wo mr die bekannti Tempelalag vo Angkor Wat goe ga aluege. Ues geits guet, aber mir si langsam gsaetigt vo Vietnam und freue ues uf China. Maengisch ischs muehsam, aber mir heis bis itze immer choenne manage! Am Meischte ufgregt hei mr ues darueber, dass si ueberhoupt ke Sorg zur Umwelt hei! Si gheie aues a Bode! Dr Flo het o e spezielli Erfahrig mit re sehr grosse Kakerlake gmacht, wo ir Nacht ueber ihn drueber gwanderet isch, aber es geit ihm jetzt guet :-)! Am 13. August si mr wider in Saigon, wo mr no vier Taeg waerde blibe, bis mr de am 18. August nach Shanghai fluege. Mir maelde ues de wider, we mr choei.
Lg Flo und Dario
P.s: A Roman, ke Angscht YB wird Basel scho bezwinge... ;-) !
Permalink
Posted in
Juli 2008
| 22. Juli 2008, 17:29
Hallo zaeme
Huet geit uesi Reis witer richtig Suede, mir goe i nes chlises Staedtli, wo Ninh Binh heisst. Huet verloe mr dr Kurt, mi Verwandt. Schad, denn mir heiss hie bi ihm sehr guet gha! Geschter si mr vo Sapa, emne chline Baergdoerfli zrueg cho. Mir si uf re Trekkingtour gsi, wo ca. 6 Stund het duret. Hei es paar Doerfli vo de Iheimische bsuecht. Die Luet dert obe laebe wuerklech sehr primitiv! D Fahrt vo Hanoi nach Sapa isch uebrigens 10 Stund gange, es isch nid so ne bequemi Reis gsi! Mit emne schwizer Zug waers oeppe 4 Stund gange :-)
Geschter si mr zum Abschluss no mit em Kurt und sire Familie i nes schoens Restaurant ga aesse, ha zum erschte mau Chrabbe usprobiert :-) Naer si mir no ine Bar vore Hotelalag, wo mr e Abschlussdrink, e Jack Daniels, gschbaendiert becho hei. Dr Ufenthalt bim Kurt het ues z Laebe agnaehmer gmacht und erliechteret, itz geits mit der Suechi nach Hotels wieder los :-( Mir hei ues o scho a Verkehr gwoehnt, denn das isch in Vietnam es eigets Kapitu! D Vietnamese rase und haute sech nid gross ad Verkehrsregle. Weme uebers Trottoir wot, was es nid viu git, warte si nid, we muess eifach louefe, o we me sich das am Afang nid so trout.
Lg Dario und Flo
P.s: Uf d Biuder muesst dr aeuae no es Zitli warte :-(
Permalink
Posted in
Juli 2008
| 18. Juli 2008, 00:34
Mir haens gued do in Asie. D Bilder druflade het grad nid funktioniert. In de letschte Daeg hae mr Hanoi agluegt, sin im Wasserbubbetheater gsi und sin eins vo de neue siebe Waeltwunder, d Halong-Bucht, go bestuune. Die naechschte drey Daeg goe mr uf Sapa, e kleins Baergdoerfli in dr noechi vo dr chinesische Graenze.
lg Dario und Flo
Permalink
